عمرو أديب: العالم هيرجع زى ما كان لكن بشكله الجديد.. كل حاجة فيه هتتغير

أكد الإعلامي عمرو أديب، أن العلماء أكدوا أن فيروس كورونا سيعود بشكل أكبر في نهاية السنة، وقال: "الأدوية اللي قالوا إنها بتعالج فيروس كورونا طلعت كلها مش نافعة وبتمثل خطورة على الإنسان، اللي نافع دلوقتي هو العلاج بالأجسام المضادة، وفي بريطانيا في شركتين شغالين على عمل لقاح ضد فيروس كورونا، والناس ادتلهم مليارات عشان يطلعوا باللقاح في أٌقرب وقت".

وأضاف: "ترامب طلع وقال في أنواع من المطهرات لو اتحقن بيها الجسم هيعالج فيروس كورونا، وطلع بعدها قال على فكرة أنا كنت بهزر، وطلعت بعدها أكبر شركات المطهرات حذرت وقالت يا جماعة اوعى حد يحقن نفسه بالمطهرات لأنها ممكن تقتل الإنسان، وطلع ناس بيقولوا أن في درجات حرارة معينة بتقضي على الفيروس، بس لازم يحطوا الناس في غلاية وده مستحيل".

وقال عمرو أديب: "خلاصة الأمر أن في مفيش أدوية ولا في لقاح ضد فيروس كورونا لكن اللي الناس اتفقوا عليه في كل الدول، هو التباعد الاجتماعي ولبس الكمامات والقفازات والكحول الإيثيلي، مفيش أي حقائق أخرى نقدر نتكلم فيها دلوقتي، والعلماء اكتشفت أن أكثر الإصابات بتيجي للمخالطين، النسبة القليلة هي لما تلمس حاجة لمسها المريض قبلك".

وأضاف عمرو أديب: "على مدار عشرات السنين، أمريكا أكتر دولة كانت بتدي مصر معونات، ومصر ردتلها ده في شكل مساعدات لمواجهة فيروس كورونا، العالم اتغير خالص دلوقتي، مبقاش في هوس إن فلان جاله كورونا، الحياة في العالم سوف تعود، ولكن بطريقة جديدة، لو عاوز ترجع للعالم يجب أن تلتزم بالطريقة الجديدة، وتدفع تمن الطريقة الجديدة، العالم هيرجع بشكله الجديد".