حلا شيحة: "كنت محتاجة أبعد الفترة اللى فاتت.. ومش ممكن أسيب الفن"

كشفت الفنانة حلا شيحة عن أسرار أخر تدوينة لها على حسابها عبر إنستجرام، قائلة "دي رسالة لنفسي.. وبوجها لكل الناس اللي بيتعرضوا لكلام ممكن يضايقهم زي ما أنا أتعرضت لكلام من وقت رجوعي إلى الآن".

وتابعت "حلا"، خلال مداخلة هاتفية فى برنامج القاهرة الان المذاع على قناة العربية الحدث والذى تقدمة الإعلامية لميس الحديدى، "دى صفحتي الفنية ولحد دلوقتي لما بنشر أي حاجة تخص عملي في الاستوديوهات أو شغلي بلاقي ناس بتشتم فيا.. ودي حاجات غريبة مش فاهماها.. لا أعتقد أن ده الجمهور بتاعنا وأعتقد أنهم لجان إلكترونية موجهة هدفها إيذاء الفنان"، وأكملت "في بعض الأحيان بعدي، وأحياناً بضايق زي أي حد".

ووصفت "حلا" الهجوم عليها منذ عودتها بالطاقة السلبية، مشيرة إلى أن الاعتراض لابد أن يكون باحترام وبطريقة بسيطة غير توجيه النصيحة بشكل مؤدب، ولذلك كتبت التدوينة دي.

وأكملت حلا شيحة،"سعيدة برجوعي.. أنا بحب الفن أنا مولودة وجوايا حتة فنية.. صحيح أنا من عائلة فنية لكن أنا فنانة منذ صغري بحب الموسيقى وكل الأنواع... الفن حتة مني".

وعلقت على فترة غيابها قائلة، "كنت محتاجة الفترة دي ولازم نعرف أن أي حاجة بتحصل ليها سبب وحكمة من عند ربنا.. كان نفسي أخلف ويبقى عندي ولاد فاختفيت  ورجعت بعد 12 سنة بعد ما عملت اللي أنا عاوزاه.. وده طبيعي في محطات الحياة".

وأكملت حلا، "الإنسان بيتغير في مراحل عمره.. بيبقى مختلف في العشرين غير الثلاثين أو الأربعين".