الذكرى 82 لميلاد الخال.. اسمع قصيدة "العمة يامنة" بصوت أية الأبنودى.. فيديو

تحل اليوم الذكرى الـ 82 لميلاد الشاعر "عبد الرحمن الإبنودى" أحد أعظم شعراء العامية بمصر، إذ ولد فى 11 أبريل عام 1938، فى قرية أبنود بمحافظة قنا فى صعيد مصر، وغاب عن عالمنا فى 21 أبريل 2015 عن عمر ناهز 77 عاما.

وحرصت " أية عبد الرحمن الإبنودى" الابنة الكبرى للخال على مشاركة محبى الخال بألقاء "قصيدة العمة يأمنة" من خلال "موقع اليوم السابع" وقالت " أية " إن قصيدة "يامنة" أحد القصائد الواقعية فى حياة الأبنودى،  والتى تمثل حكايته مع عمته "يامنة" أحد أكثر سيدات العائلة قربا للأبنودى،  والتى طالما ارتبط بها وهو صغير،  وكانت كثيرة النصح له،  خاصة وأنها عاشت وحيدة،  بعدما رحلت ابنتيها "راجية" و"ناجية"

وإلى كلمات القصيدة.

 "والله وشبت يا عبد الرُّحمن ..عجّزت يا واد .؟ مُسْرَعْ؟ متى وكيف؟ عاد اللى يعجز فى بلاده غير اللى يعجز ضيف.!! هلكوك النسوان؟ شفتك مرة فى التلفزيون ومرة .. ورونى صورتك فى الجورنان قلت: كبر عبد الرحمن.!!" أمّـال أنا على كده مت بقى لى ميت حول!!

والله أنا خايفة ياولدى القعدة تطول..مات الشيخ محمود وماتت فاطنة اب قنديل واتباع كرم ( اب غبان )،  وانا لسه حية وباين صاحية كمان .. وكمان!! عشت كثير ..عشت إلـ حد ما شفتك عجزت يا عبد الرحمن وقالولى .. قال : خلفت!! وانت عجوز خلفت ياخويا ؟!!وبنات كمان ..؟ أمال كنت بتعمل ايه طيلة العمر اللى فات؟ دلوقت مافقت؟ وجايبهم دلوك تعمل بيهم ايه ؟ على كلٍ ..أهى ريحة من ريحتك ع الارض

يونسوا بعض…ماشى ياعبدالرحمن ..!اهو عشنا وطلنا منك بصة وشمة .دلوك بس .. ما فكرت فـ ( يامنه ) وقلت ( ياعمة )؟حبيبى انت ياعبدالرحمن والله حبيبى .. وتتحب على قد ما سارقاك الغربة. لكن ليك قلب مش زى ولاد الكلب اللى نسيونا زمان !! حلوه مرتك .. وعويلاتك ؟ والا شبهنا ؟سميتهم ايه؟ قالولى : ( أية .. ونور) ماعرفتش تجيب لك حتة واد ؟والا اقولك: يعنى اللى جبناهم..نفعونا فى الدنيا بإيه ؟ غيرش الانسان مغرور!!ولسة يامنه حتعيش وحتلبس لما جايب لى قطيفة وكستور؟ كنت اديتهمنى فلوس اشترى للركبة دهان. أ بـا ى ما مجلع قوى يا عبدالرحمن

طب ده انا ليا ست سنين..مزروعة فى ضهر الباب.لم طلوا عليا احبة ولا اغراب خليهم .. ينفعوا .. اعملهم اكفان. كرمش .. وشى !! فاكر يامنه .. وفاكر الوش؟ اوعى تصدقها الدنيا.غش فـ غش!! اذا جاك الموت ياولدى موت على طولاللى تخطفوا فضلوا احباب. صاحيين فى القلب. كأن ماحدش غاب واللى ماتوا حته .. حته ونشفوا وهم لسه حيين حتى ( سلام عليكم) مش بتعدى من بره الاعتاب!! اول مايجيك الموت … افتح اول ما ينادى عليك .. اجلح انت الكسبان… اوعى تحسبها احساب ولا واد .. ولا بت ده زمن .. يوم مايصدق .. كداب!! سيبها لهم بالحال والمال وانفد

اوعى تبص وراك الورث تراب وحيطان الايام طين وعيالك .. بيك مش بيك عايشين!! يوووووه يازمن مشوار طولان.. واللى يطوله يوم عن يومه ياحبيبى حمار !! الدواء عاوزاه لوجيعة الركبه .مش لطوالة العمر اوعى تصدق الوانها صفر وحمر مش كنت جميلة ياواد… مش كنت .. وكنت وجدعه تخاف منى الرجاله لكن فين شفتونى كنتو عيال!! بناتى ( رضية ) ( ونجية ) ماتوا وراحوا وانا اللى قعدت طيب يازمان!! اوعى تعيش يوم واحد بعد عيالك. اوعى ياعبدالرحمن فى الدنيا وجع وهموم اشكال الوان الناس مابتعرفهاش اوعدهم لو حتعيش بعد عيالك ماتموت .ساعتها بس . حتعرف ايه هو الموت اول مايجى لك نط .لسه بتحكى لهم بحرى حكاية ( فاطنه وحراجى القط )؟ آ باى .. ما كنت شقى وعفريت من دون كل الولدات

كنت مخالف.. براوي..وكنت مخبى فى عنيك السحراوي.تمللى حاجات زى الحدايه..تخوى الحاجه وتطير. من صغرك بصوافر واعره ومناقير !! بس ما كنتش كداب .وادينى استنيت بالدنيا..لما شعرك شاب!! قدم البيت .اتهدت قبله بيوت وبيوت.واصيل هوه مستنينى لما اموت.. حاتيجى العيد الجاى ..واذا جيت .. حاتجينى الجاي؟ وحاتشرب مع يامنه الشاي؟ حاجى ياعمه .. وجيت… لا لقيت يامنه ولا البيت!!