يواصل "اليوم السابع" نشر نص تحقيقات جهات التحقيق مع المتهم "رامز . ع" أحد أصدقاء الطفل "أحمد . أ"، فى القضية المعروفة إعلاميًا بـ"طفل المرور"، والتى وجهت فيها اتهامات للطفل بالاعتداء والتنمر على فرد شرطة، وظهوره فى مقطع فيديو على مواقع التواصل الاجتماعي، خلال سبه الآخرين بألفاظ نابية هو و4 آخرين من أصدقائه، حيث يكشف عن تفاصيل جديدة بالواقعة وعن ناشر الفيديوهات عبر تطبيق التواصل والاجتماعى " فيس بوك".
وجاءت نص التحقيقات وأقوال صديق طفل المرور كالتالى:
س/ أسمك وسنك؟
ج/ اسمى رامز م، والسن 17 سنة.
س/ ما الذى حدث إذا يوم الواقعة؟
ج/ اللى حصل ان يوم الاثنين 26 أكتوبر 2020 كنت في المعراج عشان كنت لسه مخلص المدرسة ورحت اقابل "مصطفى . ت" صحبي في المعراج وبعدين جالى تليفون من "أحمد .أ" واللى شهرته حريقه.. وقالى أنه قاعد في بنزينة اللى في شارع الخمسين أمام المرور وأنا سألته أنت بتعمل ايه قالى أنه قاعد في البنزينة هو و"يوسف .أ" و"عمرو . أ" اللى شهرته تايسون.. وقولت له إن أنا هاروح له ومعايا مصطفى واتقابلنا وقولنا نروح ناكل وبعدين أحمد ركب عربية مرسيدس لونها أسود وروحنا ماشيين وأول ما وصلنا ميدان بيتشو في أمين شرطة وقف العربية وسأله على الرخص وقابلها على طول مصطفى كان بيصور "ستورى" من موبيله .. وأحمد رد على الأمين قاله مش معايا رخص وبعدين قاله فين كمامتك راح امين الشرطة قاله معهوش راح أحمد قاله ابعد عنى وانت بتتكلم طيب راح الأمين قال سيب العربية او وقفها حاجة زي كده راح أحمد اتحرك بالعربية عشان يمشي.. راح الأمين شاط برجله باب العربية ناحية الازاز بتاع احمد راح احمد وهو ماشى شمته بامه وبعدها أحمد قال هرجعله ولف وركن ونزل منها هو ومصطفى وعمرو وفضلت أنا ويوسف في العربية وكانو بيشدوا معاه عشان شاط العربية مسمعتش اللى دار بينهم وبعده رجعوا العربية علشان نروح ناكل واحنا في الطريق قررنا ان احمد لازم يرجع يعتذر لأمين الشرطة وفعلا رجعناله واحمد اعتذرله وأمين الشرطة قاله خلاص مفيش حاجة طالما انت عرفت غلطك أنا مسامحك انت زى اخويا الصغير.. وعدى 3 أيام ويوم الخميس 29 أكتوبر 2020 لقيت أحمد بعتلى فيديو اللى هو ظاهر فيه وهو بيشتم أمين الشرطة وبعت ليا رقم تليفون تحت الفيديو وكان مكلمنى قابلها وقالى صاحب الرقم ده هو اللى شير الفيديو على النت ولما كلمت صاحب الرقم عشان يمسح الفيديو عرفنا بعد كده ان أصحاب أحمد هما ادوا الرقم لأحمد للولد اللى أسمه أدهم اللى هو نشر الفيديو.
س/ ملك من السيارة محل الواقعة؟
ج/ أنا مش عارف هي بتاعة مين من عيلة أحمد.
س/ هل اعتاد المتهم أحمد قيادة السيارة سالفة الذكر؟
ج/ أيوة علشان أنا بشوفه بينزل فيديوهات "ستورى" وهو بيسوق العربية دى.
س/ منذ متى ويقوم سالف الذكر قيادة تلك السيارة؟
ج/ من حوالى 6 شهور تقريبا.
ملحوظة: قمنا بعرض الفيديو محل الواقعة على المتهم الماثل امامنا
س/ ما قولك فيما عرض عليك الان من مقطع مرئى؟
ج/ هو ده الفيديو اللى صوره مصطفى اول مره أمين الشرطة وقف أحمد بالعربية المرسيدس واحنا معاه.
س/ جراء قيام المجنى عليه بركل السيارة.. هل سقط أرضا أو حدثت به إصابات؟
ج/ لا هو موقعش وانا لما بصيت عليه كان واقف على رجله وما فهوش اى حاجة.
س/ ما قصدكم من ارتكاب تلك الواقعة؟
ج/ أنا معملتش حاجة بس أنا حسيت أن أحمد بيهينه وبيسئ لأمين الشرطة وأكيد بيعمل كده بسبب شغل والده وعمرو وأحمد كانوا بيضحكوا.
نص-تحقيقات-صديق-طفل-المرور
س/ ما هي المدد الزمنية التي استغرقتا الفيدهات الثلاثة محل الواقعة؟
ج/ الفيديو الأول استغرق حوالى دقيقة والثانى حوالى دقيقتين والثالث حوالى دقيقتين أو ثلاثة.
س/ هل تم تداول المقاطع المرئية فيما بينكم عقب انتهاء تلك الواقعة؟
ج/ أنا مصورتش اى حاجة ولا اتبعت ليا اى فيديوهات غير الفيديو الأول من أحمد بعد الموضوع ما انتشر على الفيس بوك.
س/ ما سبب قيام المتهم بإرسال ذلك المقطع المرئى لك؟
ج/ هو بعت ليا على الواتس اب وبعت تحته رقم تليفون وكان مكلمنى وقالى ان ده رفم اللى نشر الفيديو على النت وعرف ده من صحابه وطلب منى اكلمه عشان اطلب منه انه يمسح الفيديو.
س/ هل استجبت لطلب سالف الذكر؟
ج/ ايوه كلمته وقالى اسمه كريم . أ . م وطلب منه أنه يمسح الفيديو ولكن الفيديو انتشر في كل حتة.
س/ وكيف تحصل سالف الذكر على المقطع المرئى؟
ج/ هو قالى ساعتها انه لاقاه على الفيس بوك زيه زي غيره.
س/ إذا من القائم بإرسال المقاطع المرئية لشخص ناشرها على مواقع التواصل الاجتماعي؟
ج/ أنا معرفش كل اللي شوفته ان مصطفى بعت الفيديوهات لأحمد في نفس اليوم اللى صورها فيه.
س/ ما صلتلك وصلة المتهم أحمد والمدعو كريم . أ؟
ج/ اللى عرفناه أنه واحد صاحب صاحب أحمد وأسمه أدهم أنا معرفوش.
تم أضافة تعليقك سوف يظهر بعد المراجعة