الدكتور حمدى السيد: الإخوان كانوا يتجسسون على مهدى عاكف

كشف الدكتور حمدى السيد نقيب الأطباء الأسبق خلال لقائه ببرنامج من مصر مع الإعلامى عمرو خليل المذاع على قناة cbc، ما عايشه من خداع جماعة الإخوان وما كان يطلبه منه عصام العريان من مقابلات ووساطات.

وأضاف نقيب الأطباء الأسبق: أن جماعة الإخوان خدعت الجميع بأنها فصيل سياسى وكيف كانت قيادات الإخوان يتجسسون على مهدى عاكف مرشد الجماعة، وقال أسامة رسلان طلب منى الوساطة علشان يبقى أمين النقابة وقولتله هكلم مهدى عاكف لأنى كنت باستمرار بشوفه ورحتله القصر الجديد فى المقطم اللى اشتروه بـ35 مليون جنيه.

وتابع: ورحت وكانوا عاملينله مكتب وجنبيه كرسيين وفوق كانت مكاتب فخمة وقالولى طالما أنت تشهدله إحنا نشيله على رأسنا، وبعد شوية لقيت حد نازل كان محمود عزت وسلم عليا وقالى أسامة لأ طيب وده عرف إزاى، مهدى ما كانش عنده مكتب كان لسه بعيد وقالى أسامة رسلان لأ ده ما بيقعدش فى مكتبه.

وأكمل: لجنة الإغاثة الإسلامية كانت الناس بتدفع علشان كانوا بيشتغلوا تحت شعار الدين فكانوا فاكرين إن الفلوس هتنفق فى مكانها الصحيح وكانوا بيلموا علشان تسونامى وأفغانستان والبوسنة والهرسك، وطلبت إن ما فيش فلوس تدخل إلا بإيصال وما حصلش إنهم مدوا إيدهم على مليم وأنا موجود، كنت عامل حساب العاملين عليها وقالولى بتوع الأزهر 10% وأنا نزلتها إلى 5%، كانت الفلوس بتروح معظمها فى الحوادث وصرفنا للمسيحيين منها زى المسلمين بالظبط.