داعب الفنان أحمد رزق، الفنان شريف منير خلال لقائه ببرنامج "أنا وبنتى" المذاع عبر قناة ON E، حينما قال له "هتنورنا فى رمضان السنة دى"، فى إشارة إلى ظهوره بالدراما الرمضانية، ليرد عليه رزق قائلاً "لأ.. بس ممكن أجى أنورك فى البيت".
وقال أحمد رزق، إنه ثالث إخوته، الذين يبلغ عددهم 3 أشقاء، وكانت والدته تقسم رحلة شراء الخبز يوميًا بينه وبين أشقائه، مردفا "كانت اللحظة اللى تروح تجيب فيها عيش، بتحس أنها عبء شديد على الواحد، ودلوقتى أنا أتمنى إنه تبقى مسئولياتى أجيب عيش، علشان دلوقتى المسئوليات زادت جدًا عن العيش".
وبمناسبة شراء الخبز فى الصغر، روى الفنان شريف منير، موقفًا طريفًا له قائلاً "كنت فى أولى ثانوى وكانت مسئولياتى فى البيت أنزل أشترى الحاجات علشان أنا الكبير، وكان ليا صديق فى الثانوى عنده عربية وكان بيجي ياخد الكتاب منى، وأبويا مرة قالى انزل اشترى عيش فينو من الفرن، ونزلت اشتريت وأنا راجع لقيت صاحبى واقفلى تحت البيت بالعربية، وقولتله عاوز أخد لفة بالعربية، وحطيت العيش فى الكرسى اللى جنبى، ولما ركبت العربية كنت قصير فلفت منى وجيت أسيطر عليها، خبطت فى عربية 128 زيرو، وبعدين خرجت من العربية وخدت العيش فى إيدى واستخبيت، فصاحب العربية قابل أبويا ودفع مبلغ 50 جنيه فلوس العربية اللى هتتصلح، فقالى أنا باعتك تجيب 5 أرغفة تجبلى 5 أرغفة بـ50 جنيها".
تم أضافة تعليقك سوف يظهر بعد المراجعة