فيسبوك
واتساب
دق الساعات كأنه صوت زئير
من كتر خوفى ما بسمعوش
خايف أغمض عينى.. أحلم
أصحى ألاقى الحلم سابق
وفى غفلتى مالحقتهوش
ألاقى سنين عُمرى
سبقانى فى قطر طالع بيجرى
عجلاته مابيقفوش
واللى فات يوم أو يومين
طب مين حسبهم سنين
وحسابه غَيّر فى الوشوش؟!!
واللى كان صبى أصبح
شباب..
وخطوة ويلاقى الشعر شاب
والأيام تبقى وحوش
واللون الأبيض...
اللى كان عاشقه فى صغره
لما كبر ما حبهوش
يشوفه فى خصلات شَعره
يفتكر زمنه اللى عدّى
ويقول خسارة ماعيشتهوش.
يعاتب عقارب ساعته
اللى طايحة
بتاكل عُمرنا
وكأننا سمك صغير
وهما قروش.
ويقولها واحدة واحدة
لدغ العقارب...
ما بستحملوش
