السلام عليكم ورحمة الله وبركاته.. إزيك يا عروسة منك ليها ليها لها، العواف عليكن نفراية نفراية، أحب أوجه التحية لكل ته مربوطة ماشية على وجه البسيطة، وأحب أبلغ سلامي وتقديري واحترامي لكل فيونكة "pink" طالعة السلالم يا ماشا الله عليها، أولًا أحب أعرفكن بنفسى المتواضعة، أنا حمدى الغفير "مش" حمدى الوزير، أبدًا مطلقًا على الإطلاق، ولا أتعامل أبدًا بمبدأ كل البنات بتحبك كل البنات حلوين - مع أن ده ممكن يبقى حقيقى - وأحب أطمنك برضه أن مش من طائفة "الحكاكين" اللى بيترموا عليكى فى رسايل زي الدبان فى رسائل "الأزرززززز" ولا أنا من بتوع هاي ممكن نتعرف، ولا من اللي بيعملوا ريآكت قلب على صورتك وأنا معرفكيش، ولا من متسولى الكومنتات عشان أشقطك من كومنت فى بيدج وأنت عاملة منشن لسمر صاحبتك، فلما أقولك أنا مش حمدي الوزير مترفعيش في حواجبك وتكرمشيلي في بقك والمرض الكلابي وأنتي بتغمزي لصاحبتك، وعشان تطمني خالص أديني بحلفلك أهوه، يمين بالله أنا مش حمدى الوزير، عظيم بيمين أنا مش حمدى الوزير، على الطلاق بالتلاتة أن مش حمدى الوزير، أعدمك أنت وصاحبتك هند وبنت خالتك تهانى اللى أنتى بتغيرى منها وعاملة نفسك أنتيمتها أنا مش حمدى الوزير، أنا حمدى الغفير بمشى من غير ما أعمل "بوقليلة" ببوقى ومش بغمز بعينى.
أنا يا ست البنات يا غالية الغاليات شخص عادى جدًا بيمشى فى الشارع من غير ما يتأمل تفاصيلك يا ست "كيم" ولا بيقصد يطلع وراكى السلم عشان يتفرج على تقوسات فقرات عمودك الفقرى، اللى محتاج زرجينه عشان يتظبط، ولا بملى عينى فى أتبك اللى محتاج سكينة شاورمة عشان تشيل الزوايد، ومش عاوز أفاجئك بقى "بس ساعات بخاف أنتِ تبصى عليا"، ومع ذلك أحب أقولك وأعرفك وأرسخ فى يقينك أنى مش كائن ذكورى متعفن يرى أن شرور العالم كلها مجتمعة فى المرأة ولا عندى عقد نفسية مع البنات الحلوين الطعمين، ولا أتقدمت لست بنات ورفضونى، كما أننى من مؤيدي قاعدة "أنتي عسلية أنتي منجاية أنتي تفحاية" نتلكم جد شوية عشان أنتِ فكرانى بهرج، على فكرة أنتِ مش نص المجتمع، أنتِ المجتمع كله وعنصر البهجة اللى بنشوفه فى كل حاجة، وعلى فكرة لو قولتى وأنتِ ماشية جنبى "السود عيونه" هرد أقولك "يا ولاااااا" من غير ما تكون نيتى وحشة، ولو ماشية بتدندنى على كوبرى قصرى النيل وبتقولى "أنا بحبك أكتر" هتلاقينى على طول بقولك "أهأ أهأ" برضه من غير أى نية مبيتة للحك، فرحتى، فرحتى خلاص؟!، عاوز بس أسألك على كام حاجة، "ليه بتعلمى كدة؟"
طبعًا أنتِ عاوزة تعرفى "كدة" ده اللى هو إيه، اتقلى يا غالية اتقلى يا "حبعمراااى"، المرادى والمرات الجاية إن شاء الله هعرفك أنتِ بتعملى فينا إيه؟ وبالمناسبة دى مساحة عشان تعرفى الفئة اللى قرفانا منكن بتعمل إيه، صديقاتى البنات الـ"Anti" سهوكة أنتن مدعوات هنا لسؤال صاحبتكو اللى هيموتو "أوفر دوز محن" عن أسباب اللى بتعمله فينا، وعشان معملش زيكو وأشوق ولا أدوق هقولكوا على عينة من الحاجات دى، ولا أقولك والله ما أنا قايل.. خليكو كدة هتموتوا لحد بكرة.
شايفك يا اللي بتزغري
تم أضافة تعليقك سوف يظهر بعد المراجعة