مساعد كوبر يكشف كواليس مشاركة الفراعنة فى أمم أفريقيا بـ"قصة قصيرة"

سرد محمود فايز مساعد الأرجنتينى هيكتور كوبر المدير الفنى للمنتخب الوطنى- فيما يشبه القصة القصيرة- كواليس ولحظات بعثة الفراعنة خلال تواجدها بالجابون للمشاركة فى بطولة أمم أفريقيا 2017، والتى انطلقت من يوم 14 يناير، حتى 5 فبراير الجارى.

وحصد المنتخب الوطنى المركز الثانى بعد الخسارة فى مباراة النهائى من المنتخب الكاميرونى "حامل اللقب" بنتيجة 2/1، وقدم الفراعنة أداء مشرف ونجحوا فى تعويض غياب المنتخبات العربية التى تم اقصائها من الأدوار الأولى.

وسرد مدرب المنتخب كواليس البعثة عبر حسابه على "الفيس بوك" بطريقة القصص القصيرة، والتى جاءت كالتالى.. "حوالى ٣٦ يوم فاتوا علينا مع بعض.. جهاز فنى وإدارى وطبى ولاعبين.. فاتوا كالحلم.. اشتغلنا وتعبنا وقاتلنا.. ضحكنا وبكينا.. سهرنا وقلقنا وفرحنا.. من أحلى أيام حياتنا، شكراً للاعيبه الأبطال.. اللى بجد ضربوا اقوى مثل للتحدى والإصرار والعزيمة والتضحية.

هنحكى لأولادهم وأهاليهم أنهم قاتلوا حتى النهاية.. لحد آخر نفس.. خرجنا مرفوعين الراس بجهدهم وعرقهم. هنحكى لأولاد الننى انه كان بيصحى كل يوم الساعة ٥ الفجر تقويات فى حمام السباحة علشان يلحق الماتشات!. هنحكى لأهل مروان وعبدالشافى وكوكا وإكرامى والشناوى أنهم كانوا بيبكوا دم علشان الإصابة.. وإنهم قاتلوا للعودة. هنحكى عن قتال صلاح وعبدالله ورمضان ووردة وفدائية طارق وإبراهيم صلاح وتريزيجيه وتحدى الحضرى وصلابة حجازى وعلى ورجولة فتحى والمحمدى وروح كهربا وعمر وكريم وطلبة ودويدار وسعد.

هنحكى بفخر وعزة عن أبطال 2017

احنا مخلوقين فى الدنيا دى علشان نسعى ونعمل ونجتهد ومش لازم فى الأخير ننتصر.. فالانتصار نسبى.. السعى والجهد والعرق ده فى حد ذاته انتصار.. لأن بجهدك وعرقك وتعبك خلاص أنت انتصرت.. كسبت.. يمكن كان نفسنا نفرح الشعب الطيب الغلبان بالكأس بس قدر الله وما شاء فعل.

شكراً لاخواتى فى الجهاز الفنى.. الجهاز الطبى.. الجهاز الإدارى.. الكل أخلص واجتهد وتعب!.. شكراً للناس كلها اللى دعمت ووقفت ورانا قبل البطولة وبعدها.. ويارب نعوضها فى كأس العالم 2018".