هشام محمد المعاز يكتب: يا مصرية يا ست الدار

يا ست الدار يا مصرية يا شايلة هموم ومرتاحة

ومبسوطة ومرضية وعطرك ريحتــــــه فواحة

أصيلة إن كنتى دكتورة وبرده إن كنتى فلاحــــة

وإذا انضريتى يوم صابرة ولا بتردى ببجاحــــة

ياست الكل يا جميلة يا شايلــــــة فوق همومك دار

يابنت أصــــــول يا أمورة وقلبــك زى ضى نهــــار

يا حاملة هم أولادك وأولادهـــــــــم وهما كـــــــبار

يا بانية الحلم فى قلوبهم وبعيونهم بفضــــــــلك صار

يا كاتمة وصابرة فى الأزمـة ولا بينتى أى غـــــبار

ولا قولتى ولا عيدتى وعارفة أن البيوت أســــــــرار

يا صاينة العيش ومحرومة وخيرك غطى حتى الجار

عديمة العملة فى جيوبك وبيتك ما انطــــــــــــفاله نار

ولا كل الكـــلام ينــــفع ولا بيكفى أوصـــــــافك

ومن يغلط فى حقك يوم. ولا عرفك ولا شــــافك

وراضية برده أهل البيه وشايلاهم على كــــتافك

ودافعة الشر بالمعروف، أصيلة ف كل أحــوالك

كريمة برده ويا الضيف ويشـــــهد كل من جالك

شهادتى فيكى مجروحة ماهو أنت الأم والصاحبة

وانتى الأخت وقت الضيق وانتى اللمة والصحبة

وانتى بنتى أمــــورة فى قـــلبى قاعدة ومرابطـــة

ولو غيبتى. فى بعدك يوم ولا لكل الـــوجود لزمه.