صور.. نادية الجندى لـON E: حبيت عماد حمدى برغم إنه كان غيور ومش عايزنى أمثل

قالت نادية الجندى إنها أحبت الفنان عماد حمدى ولم ترتبط به لاستغلاله من أجل مساعدتها فى الظهور بالأعمال السينمائية، كاشفة عن أن عماد حمدى كان غيورا عليها جدا ولم يكن يرد لها أن تستكمل مسيرتها فى الفن.

وأضافت الجندى، خلال حوارها ببرنامج "أنا وأنا"، المذاع على قناة ON E، وتقدمه الإعلامية سمر يسرى: "أنا حبيت عماد حمدى بدليل إنى عشت معاه حولى 8 أو 9 سنين، ماقدمنيش فى ولا عمل فنى، أنا حبيت عماد حمدى وأنا طفلة مراهقة كان عمرى 15 سنة، والمشكلة إن لو راجل كبير اتجوز بنت صغيرة فيبقى خايف لاسيبه، وده اللى بيخلق الضغوطات والمشاكل، عماد حمدى كان بيغير جداً وماكنش عايزنى أمثل".

وتابعت نادية الجندى: "كان حاجة مهمة فى حياتى، كان أبويا وكان أستاذى ولآخر يوم فى عمرى ما اتخليتش عن عماد حمدى، وخدته معايا أنا ومحمد مختار فى فيلم الباطنية".

وأضافت الجندى: "استحملت فى بداية جوازى بعماد حمدى كتير عشان خاطر ابنى هشام، اتعلمت منه حبه لفنه وإخلاصه لزملائه وزميلاته، هو من الجيل المحترم اللى فيه صفات مش موجودة دلوقتى، وأحلى حاجة خدتها من عماد حمدى ابنى هشام"، مؤكدة: "والدى ووالدتى لم يكونا موافقين على جوازى بعماد حمدى بسبب فرق السن ما بينا، وقاطعونى حوالى سنة".