حصل"اليوم السابع"على نص التحقيق مع 3 طالبات اتهمن مدرس رياضة بالتحرش بهن جنسيا داخل مدرسة ثانوى فى منطقة العجوزة والتى أجريت بواسطة المستشار محمد سويفى وكيل نيابة العجوزة، بإشراف المستشار هادى عزب رئيس النيابة، والمستشار أحمد البقلى المحامى العام الأول لنيابات الجيزة وانتهت بإحالة القضية لمحكمة جنح العجوزة برئاسة المستشار سمير سكر، وسكرتارية سامى غريب، حيث تحددت جلسة 6 سبتمبر المقبل لبدء المحاكمة فيما تبذل الشرطة جهودها للقبض على المدرس المتهم.
وتضمنت التحقيقات سماع أقوال والدة إحدى الطالبات المتضررات على النحو التالى:
ما اسمك وسنك ووظيفتك؟
اسمى" ن.ع"،37 عاما، ربة منزل
ما تفصيلات الواقعة تحديدا؟
اللى حصل إن بنتى جات لى الأسبوع الماضى وقالت لى إن الأستاذ بتاعها بيضايقها علشان راحت تسأله عن طريقة سهلة للمذاكرة، وقال لها يعنى أى حاجة هقول لك عليها هتعمليها؟.. وهى قالت له زى إيه قال لها يعنى لو واحد هيطلب حاجة من واحدة هيكون إيه؟.. وراحت سيباه ومشيت وتانى يوم الأستاذ ده نده عليها وقالت له عاوز إيه منى، قال لها يعنى إحنا هنطلع نلعب مع بعض فى المناطق إلى فوق وملناش دعوة بالمكان اللى يودى فى داهية، راحت سيباه ومشيت.
وأضافت: بنتى جاءت قالت لى الكلام ده أنا خوفت عليها وبقيت أروح معاها الامتحانات والدروس وكل ما نروح المدرسة المتهم يبص على بنتى بطريقة وحشة، وفى يوم الأحد اللى فات كانت بنتى قاعدة مع أصحابها البنات والمدرس دخل عليهم ونده عليها لوحدها ولما راحت له كانت خايفة، وقال لها فكرتى؟ فقالت له حضرتك عايز إية بالظبط وساعتها سجلت الكلام بتاعه بتليفون صاحبتها فقال لها إيه إحنا مش اتكلمنا فقالت له المادة بتاعة حضرتك خلصت خلاص، فقال لها أنت لسة فى إيدى وعندك امتحان يوم التلات والخميس وهظبطك فى الامتحانات دى وقالت له أنت عايز منى إيه من الآخر، قال لها هنخرج وهفسحك بالعربية وهنروح الشقة بتاعتى نرقص رقصة حلوة ونتفرج على فيلم حلو كدة نعيد بيه أيام الشباب، وهى قالت له إشمعنا أنا؟.. قال لها: أصل دول ناشفين مفهمش حاجة، وقال لها فكرى وردى عليه وخدى رقم تليفونى وبعد كده خرجت من عنده وفضلت تعيط ورجعت على البيت وقالت لى اللى حصل وروحنا عملنا بلاغ.
متى وأين حدث ذلك؟
الكلام ده حصل يوم الأحد اللى فات بإحدى مدارس العجوزة للبنات.
ثم كانت تفاصيل التحقيقات مع والدة الطالبة الثانية كالتالى:
ما هى صلتك بالمدعية؟
هى بنتى
ما سنها تحديدا؟
عندها 17 عاما
ما هى كيفية علمك بالواقعة؟
هى قالت لى على اللى حصل.
وما الذى حدث تحديدا؟
هى قالت لى إن فيه مدرس رياضيات فى المدرسة عندها كل شوية يتعرض لها وعايز منها حاجات وحشة وقال لها هظبطك فى الامتحانات والنتيجة.
ما طبيعة الأشياء التى طلبها المشكو فى حقه تحديدا؟
هو قال لها أنا عندى شقة وعاوزين نخرج مع بعض وهفسحك والفلوس اللى أنت عاوزاها هديها لك بس هنبقا نروح الشقة نتفرج على أفلام حلوة ونرقص رقصة حلوة وهنلعب فى الأماكن إلى فوق وملناش دعوة بالأماكن اللى تودى فى داهية ومتخفيش هخليكى بنت بنوت زى ما أنت.
هل شاهدتى ذلك الحوار بنفسك؟
لا بنتى اللى قالت لى عليه.
هل تطور ذلك الحديث إلى أفعال مادية تعرض بها المشكو فى حقه لابنتك؟
هو حاول مرة يمسك أيديها عشان يحضنها ولما الطلبة شافوه خاف وهى زقته.
هل استخدم وسائل إكراه تجاه كريمتك؟
أيوه.. كان بيهددها بأنه هيسقطها فى الامتحانات لو مسمعتش كلامه هى وأصحابها وكان بيقول لأصحابها البنات إن نجاحكم متوقف على حاجة بينى وبين "خ"
ما الضرر الواقع عليك أو ابنتك من جراء الواقعة؟
هو تحرش ببنتى بالألفاظ وهددها أنه هيسقطها فى الامتحانات لو مسمعتش كلامه.
هل سبق لابنتك التعرض لهذا الموقف من قبل؟
لا دى أول مرة.
هل لديك أقوال أخرى؟
لا
وفى استجواب النيابة للطالبة المجنى عليها سألتها التالى:
ما تفصيلات بلاغك؟
أنا فوجئت بالأستاذ "منتصر.ع" مدرس الرياضيات بيقول لى ألفاظ خادشة للحياء العام فى تحرش لفظى، وفوجئت به يمسك يدى محاولا التحرش بى جسديا، وعرض على النجاح مقابل سماع كلامه فيما قرره لى، وقال لى: "تعالى معايا الشقة نعمل زى المتجوزين بس هى بوسة ورقص ونتقرج على فيلم حلو"، ولما رفضت كلامه ده قال لى طب فكرى علشان لسة فى تصحيح إجابات وأنت معايا السنة الجاية، وفوجئت أمس بيقول لى أنت فكرتى فى اللى قلت لك عليه.
وقال لى أنا هخلى مدرس يدخلك ويديلك الإجابة وعرض على علامات تميز بياناتى على ورقة الإجابة، واتصل بى على هاتفى وفوجئت به قال لى إن هو مش هيعمل حاجة تودى فى داهية وهتبقى برضوا بنت بنوت كلها حاجات خفيفة وقلت له الكلام ده غلط ومينفعش تقوله لقيته بيقول لى (لفظ خارج) أنا أعمل إللى أنا عايزه وخلى بالك مستقبلك فى إيدى، وأنا منتظر ردك عليه لما تيجى المرة الجاية، وأنا قولت لماما وبابا نعمل محضر مع زملاتى لأن حصل معاهم نفس الكلام.
متى وأين حدث ذلك؟
الكلام ده حصل من أسبوع وأمس داخل مدرسة العجوزة الإعدادية الثانوية بنات بشارع عبد المنعم رياض.
أمام من حدث ذلك؟
أمام زميلتى
ما الألفاظ الذى ذكرها لك المشكو فى حقه؟
قال لى تعالى نعمل حاجات بسيطة وما تخفيش خالص هى بوسة ونرقض ونتفرج على أفلام وهتبقى بنت بنوت زى مانتى وتعالى معايا الشقة وهديكى اللى إنت عيزاه وهيبقى كله فى الجزء العلوى وكان بيعمل حاجات ببقه فيها إغراء.
هل مسك المشكو فى حقه أجزاء من جسدك؟
مسك إيدى وحاول يمسك جسمى بس أنا رجعت للخلف ودفعته وجريت.
ما نوع التهديد الذى ذكره المشكو فى حقه؟
هددنى بالإيذاء وهددنى بالسقوط
ما قصدك من أقوالك؟
اتخاذ اللازم قانونا
هل تتهمى المشكو فى حقه بشىء؟
اتهمه بالتحرش اللفظى والبدنى بى والتهديد لى بالإيذاء وبسقوطى فى المادة.
واستمعت النيابة إلى طالبة الثانية وسألتها:
ما اسمك؟
ج: اسمى "أ.م" ـ 17 سنة طالبة بمدرسة الإعدادية والثانوية بنات بالعجوزة.
س: ما تفصيلات أقوالك؟
ج: إلى حصل إنى الأستاذ "م.ع" مدرس الرياضة علطول دائم التلفظ بألفاظ خادشة للحياء ويقوم بأفعال مخلة وإحنا بنخاف أحسن يسقطنا وفى الفترة الأخيرة كان بيضرب البنات بأيده على جسم البنات ولما كنت مع "خ.ه" فوجئت به بيقولها أنا عايزك لوحدك فلما قلت له أشمعنا هى قال لى انتى رفيعة مفكيش حاجة وقال لها انتى فكرتى إلى قولتلك عليه قالت له لا ولما كنت بسأله عن النجاح والأسئلة عن المادة قال لى الموضوع متعلق بـ"خ.ه" وكلموها عشان تنجحوا، وفى مرة كنا واقفين مرة فى الطريق قبل الحمام وقلنا يا مستر كلمنا هنا عشان كان بيمشى فقلنا إيه يعنى تعالوا معايا الحمام وقعد يقول كلام به خدش للحياء.
وهل قام المشكوا فى حقه بمسك أى جزء من جسمك؟
مسكنى من إيدى وكان بيضرب البنات على جسمهم بأيده بأسلوب وحش به شىء من التحرش.
وما الألفاظ التى ذكرها لكى المشكو فى حقه؟
أمس لما كنت مع "خ.ه" وقال لها أنا عايزك لوحدك وقلت له أنت عايزها ليه قال لى ملكيش دعوه إنتى متنفعيش إنتى رفيعه، ولما "خ" رفضت كلامه الوحش راح ضربنى فى صدرى وكان علطول بيقول لى إنتى عايزة تتخنى شويه وكان بيقوم بأفعال مخدشة للحياء وأقوال وحشة.
وما قصدك من أقولك؟
اتخاذ اللازم قانونا
هل تتهمى المجنى فى حقه بشىء؟
اتهمه بالتحرش اللفظى لى والقيام بأفعال مخلة للآداب والتهديد بالإيذاء لى وبسقوطى فى المادة.
وجاء فى نص استجواب الطالبة ثالثة ما يلى:
ما اسمك؟
اسمى "س.ع" 17 سنة طالبة بمدرسة العجوزة الإعدادية الثانوية
ما تفصيلات بلاغك؟
اللى حصل إن الأستاذ "م" كان لما يلاقى معندناش مدرس فى الفصل بيدخل لنا ويقعد معانا وكان طول ما هو قاعد فى الفصل يقول كلام وحش وفى مرة قال لى إن جسمك حلو وصدرك حلو بس عايزينه يكبر شوية وعايزة سيلكون ولا عايزة أنا أكبرهملك وعلى فكرة الجيبة دى مخلية جسمك نار، وأنا زعقت له بس خوفت أقول لأهلى أحسن يقول عليه كذابة وهو يسقطنى فى المادة، ولما سألته عن الامتحانات قال لى "خ" فى إيدها نجاحك روحى اقنعيها باللى قلته ليها وأنت تنجحى علطول وكان لما بيكون فى الفصل يقعد يبص لى ويعمل حركات بفمه ورأسه ويغمز لى بعينه.
متى وأين حدث ذلك؟
تكرر الكلام ده أكتر من مرة وآخرها أمس فى المدرسة
أمام من حدث ذلك؟
أمام زميلاتى
وهل أمسك المتهم أى جزء من جسدك؟
كان ساعات بيفتح السوسته بتاعة البنطلون ويقعد يقول كلام وحش.
ما الألفاظ التى ذكرها المشكو فى حقه لك؟
كان يقول لى جسمك حلو وصدرك حلو بس عايزينه يكبر وتعالى نعمل حاجة مع بعضنا وتعالى أكبر لك صدرك وكلام تانى وحش خالص.
تم أضافة تعليقك سوف يظهر بعد المراجعة