وفى نفس اليوم الذى نشر فيه رمضان صورة السيارتين، نشر حلمى صورة له مع سيارته المينى القديمة، والتى ظهر بها فى فيلم "ظرف طارق"، وعلق قائلاً :"تقدر تبوح بسر ينفع الناس ؟؟ للأسف لأ.. ماهو عيب الأسرار كده.. أكتر حاجة ممكن تفيد الناس بس للأسف مينفعش تتقال.. ده كلام فى سرك.. ششششش".
مستخدمو موقع التواصل الاجتماعى "فيس بوك"، تداولوا بوست حلمى خلال الأيام الماضية، على أنه سخرية من الطريقة التى أعلن بها محمد رمضان عن شراءه لسيارتين فارهتين، الأمر الذى دفع الفنان الشاب للرد على حلمى، قائلاً : "قررت أبوح بسر يفيد بعض زملائي من أسرار نجاحى الذى هو الحمد لله أسرع من لامبورجينى نفسها وذلك بفضل الله أولاً ثم جمهوري الغالى، عمرك شوفت حد قال ثقة فى الله رقم واحد في الملأ قبل أى منافسة وبالفعل بيسبق وبيبقى رقم واحد ؟! العبد لله ومن أول يوم رجلى دخلت هذا المجال".
وأضاف رمضان فى رسالته التى وجهها لحلمى، عبر حسابه الرسمى على موقع التواصل الاجتماعى "تويتر"، دون أن يذكر اسمه، قائلاً :" خلاصة الكلام: إدعاء الفقر والاستنصاح على الناس مش هيزود شعبيتك ولاهينقصها.. الشعبية والجماهيرية تكتسبها بحبك وإخلاصك لشغلك من اجل إمتاع جمهورك".
وتابع:" هتقولي بس انت مش شايف الهجوم؟! هقولك متعود عليه وهيفضل موجود طول ما أنا موجود، الدليل الهجوم اللى كان على بعض الزملاء مبقاش موجود ليه ؟! لأن الزميل نفسه مبقاش موجود .. وخد دى زميلى العزيز، ثقة فى الله نجاحى متصاعد".
من جانبه أوضح الفنان أحمد حلمى، أن التفسير الذى صاحب البوست الذى نشره منذ أيام، وفسره البعض على أنه انتقاد للفنان محمد رمضان، بعد إعلانه عن شراء سيارتين فارهتين، اقترب سعرهما من 10 ملايين جنيه، غير صحيح على الإطلاق.
وقال حلمى فى تدوينة له من خلال صفحته الرسمية على موقع التواصل الاجتماعى "فيس بوك"، "أعزائي الكرام.. توضيح بسيط وسريع بخصوص ما حدث بعد نشر الصورة بتاعتى وأنا راكب العربية المينى القديمة اللي كانت معايا في فيلم ظرف طارق.. واللى الناس فهمت إنها بغرض إنى بوجه رسالة لزميلى الفنان (محمد رمضان) وهذا ما أحزننى كثيرا، يا جماعة أنا لو عايز أوجه رسالة لأى حد أعرفه كويس أو حتى ماعرفوش مش هعمل كده على مواقع التواصل الاجتماعي، لأنى عمري ما عملت كده أبدا لأنى ببساطة ممكن أبعتله رسالة على موبايله أو هكلمه في التليفون".
وأضاف حلمى: "الكلام اللى كان مكتوب تحت الصورة اللى كتير من الناس معرفش إزاى بجد فسروه بالطريقة دي مع إنه فعلا مايخصش حد خالص غير واحد صاحبى هو الوحيد اللى هايفهمه لأني قايله بسبب موقف طريف حصل معانا و ليه علاقة بالعربيه الميني، علشان كده نهيت الكلام المكتوب بـ"ده كلام في سرك ششش".
وحرص حلمى على تصفية الأجواء بينه وبين رمضان، خاصة بعد الرسالة التى وجهها الأخير لحلمى عبر حسابه على "تويتر" مساء أمس، قائًلا: "زميلي العزيز محمد رمضان، ربنا معاك و يوفقك دايما وتحقق كل اللي نفسك فيه في حياتك الفنية".
موضوعات متعلقة
محمد رمضان ردا على منتقديه: لا ألتفت إلا لعملى وجمهورى وهدفى
تم أضافة تعليقك سوف يظهر بعد المراجعة