هلت ليالى شهر كريم
هلاله ساطع.. فى القلب نوره يقين
فرحة طفل فانوسه تزينه تلاوين
وشموع تقيد.. تنور الميادين
وجد طيب بطاقية.. وجلابية
وسبحة طويلة.. يدعى رب كريم
وأب راعى أسرته.. شقيان.. يحلل لقمته
وأم تغرس قيم.. تزرع نبت مدد للحياة والدين
إيمان وحب كبير.. قلوب عمرانه بالخير
ومدفع رمضان يضرب.. أطفال كتير حواليه
مع كل طلقة..فرحة.. قلوبهم تقول هيه
وشمس يوم تغيب.. وعيون بالدمع تفيض
وأذان فى كل مكان.. ومساجد يعمرها عباد رحمن
طبلية فى الصالة حواليها العيلة تتجمع
وصينية خشاف وعصير وتمر منقوع ومتلج
فتة ولحمة وشربة سخنة.. سلطة ورز وخضار
وأكلة هنية وفرحة تملى قلوبنا.. تزيح الحزن
والحلو كنافة وقطايف
وكباية شاى تعدل دماغ صايمين
وموائد الرحمن منصوبة فى كل ميدان
كل عابر سبيل يلاقى لنفسه مكان
تجمع المصريين وتوحد الأديان
فزوره ومسلسل تكمل الصورة
فستق وبندق.. جوز ولوز وسوداني
نقزقز ونتسلى.. ونحمد المولى.
صلاة تراويح تجمع المسلمين
ملايين مؤمنون بالله موحدين
قلوبهم عمرانه إيمان.. فى الجنة طمعانين
وليل سماه صافية يجمع الخلان
مابين صلاة وقيام.. وقراءة القرآن.
وبركة فى الأيام يزيدها الإيمان
تلاتين يوم نور.. آخرهم عيد فطور
شهر صيام وعبادات.. يزيد الحسنات
وقلوبنا تصفى وتسموا نفوسنا.
وعيد فطر يجمع أهل ويلملم الأحباب
لبس جديد..كعك عيد.. سفر وزيارات
سمر وضحك ولعب.. تتجدد الذكريات
الحاضر واللى جاى.. والماضى اللى فات
نفتكر أيام زمان.. أهلنا وحبيبنا
اللى عايش منهم.. واللى أصبح ذكريات.
هى دى أيامنا وأعيادنا
أحلام بسيطة.. وآمال مكبوتة
فرح ممزوج دمع وشجن
بسمة على الشفايف.. ودمعة فى العيون
رمضان المصرى أيامه مالهاش مثال
صوم وعبادة وقلوب متعلقة بالقرآن
بساطة وسماحة بالفطرة.. وشهر كله أيمان
من غير تشدد أو تعصب أو تحيز لإخوان
إسلام كل القلوب للواحد الغفار
أجواء رمضان
اضف تعليق
تم أضافة تعليقك سوف يظهر بعد المراجعة
عدد الردود 0
بواسطة:
نجمة البحر
الى استاذ / نصر سليمان