السيسى خلال افتتاح تطوير مستشفى القبة العسكرى... by youm7
شهد الرئيس عبد الفتاح السيسى، رئيس الجمهورية، افتتاح المرحلة الرابعة لتطوير وتحديث مستشفى كوبرى القبة العسكرى، حيث حرص السيسى على التفاعل مع العرض المقدم من الضباط والقادة، وذلك بسؤاله فى بعض التفاصيل الخاصة بكل مشروع.
خلال عرض أعمال تطوير قسم شئون المرضى ووحدة الميكروفيلم، قال الرئيس عبد الفتاح السيسى لمسئول تسجيل وحفظ بيانات المرضى: "هل ده أحدث منظومة عمل لحفظ الوثائق وأوراق المرضى فى العالم؟ يعنى أنا لو سافرت أمريكا هشوف أحدث منها؟
رد المسئول عن العرض ومسئول وحدة المايكروفيلم بمجمع كوبرى القبة الطبى بأنه بعد تطوير المنظومة لم يتبقى سوى 5 سنوات فقط من الأوراق، وأنه تم إعدام باقى المستندات بعد حفظها بنظام الميكروفيلم.. ليعيد الرئيس السيسى السؤال مرة أخرى، فرد مدير فرع النظم بالقوات المسلحة، قائلا: "ده أحدث ما يمكننا تصنيعه فى فرع النظم داخل القوات المسلحة، وليس أحدث منظومة فى العالم".. فقال الرئيس "شكراً يا فندم".
وعند شرح رئيس فرع المعامل التشخيصية المرحلة الأولى لأعمال تطوير معامل القوات المسلحة البحوث الطبية وبنك الدم، قاطعه الرئيس قائلا: "هل ده أكتر حاجه نقدر نعملها؟"، ليرد مدير المعامل قائلاً:"المرحلة القادمة من التطوير، لعمل منظومة لربط أكياس الدم منذ خروجها من المستشفى حتى وصولها للمريض، وذلك يستلزم تطوير أسلوب وأسطول نقلها، والكثير من العمل حتى يتم مراقبتها جيداً، بتكلفة حوالى 40 مليون جنيه، فقال الرئيس: "طب تصدق عليها يافندم".
وطالب الرئيس السيسى بالوصول إلى نتائج تحاليل طبية محترمة، لا يوجد مكان بالعالم، يستطيع التشكيك فى نتائجنا، وقائلا: "أنا كنت باعتلك رسالة من سنة ونص، وصلتك يافندم؟، فقال "وصلت".
وتابع الرئيس:"لو كنت قلت وقتها إنك محتاج المبلغ ده كنت صدقت، عشان نختصر الوقت.. بعد لما حطينا إيدينا فى الشغل، أصبح منظومة الصيانة إللى تعاقدنا عليها 3 سنوات، مش هندفع فلوس صيانة لمدة 3 سنوات، بدل سنة واحدة قديماً.
وعند قيام مسئول مفرزة الأمن، بعرض أعمال تطوير ساحات الانتظار، سأل الرئيس اللواء هارون أبو سحلى مدير مجمع كوبرى القبة الطبى العسكرى:"هل بناخد فلوس على انتظار السيارات فى تلك الساحات؟ ليرد اللواء هارون:"نعم يافندم".
وتابع الرئيس:"مهم جداً إننا ندور على مصدر دخل للمشاريع إللى بنفتتحها، عشان نحافظ على الخدمة إللى بتتقدم للناس، لازم أفكر أجيب الفلوس إزاى، ويؤكد:"عشان نعمل إحلال وتجديد لازم فلوس، مش هنقول الـ 3 أو 4 جنيه انتظار السيارة عبء على المواطن.. لأ.. دى ظروف دولة وبلد ظروفها صعبة، لازم كل واحد فينا يمد إيده يحط حاجة".
وأضاف السيسى: "الرفق مش إنى أقول مفيش رسوم، ولكن الرفق هو تقديم الخدمة على أعلى مستوى، وتقدم لكل الناس، بأقل تكلفة ممكنة".
وسأل الرئيس وزير الصحة عن المستشفيات المتكاملة على مستوى محافظات الجمهورية؟.. قائلا: "لو قدرنا ندخل القطاع الخاص أو المجتمع المدنى، ناخد منهم رسوم المستشفى وإقامتها، ومستلزماتها، والفلوس دى نتفق معاهم إننا نقدمها كعلاج للناس".
وأضاف: "لو مستثمر عايز ياخد مستشفى 100 سرير، أو مؤسسة الأورمان أو مصر الخير، ياخدها بمقابل مثلا مليون أو 2 مليون، والرقم ده نعمل آلية ونظام، يقدر المواطن العادى من خلاله إنه يتعالج بيه".. ليرد وزير الصحة "إحنا شغالين فى ده يافندم".. ويقاطعه الرئيس "لأ أنت تيجيلى وتقولى عندنا كام مستشفى وعملنا فيها إيه، عشان ميجيش حد يقول إننا عندنا مستشفيات مش شغالة ومش مجهزة.. لازم نعلن للناس إحنا بنعمل إيه، وشغالين إزاى.. هاتلى منظومة وعدد مستشفيات نقول إنها اشتغلت ونعلن للناس خلال فترة كذا تكون خلصانة".
وأضاف السيسى:"نرجع لمنظومة الصيانة والإحلال، الخدمة الطبية بتتكلف كتير جداً، إللى بيتحط من موازنة الجيش كتير، ولكن لازم ندور على زيادة الموارد".
ليقوم اللواء بهاء زيدان مدير أحد المستشفيات بالمجمع الطبى بكوبرى القبة بالرد قائلاً:"يا ريس إحنا اشترينا 700 ماكينة لغسيل الكلى من وزارة الصحة وأخدنا عليها ضمان 5 سنوات، وبعد السعر الجديد للدولار، خدناها بتمن زى ما خدناها من سنتين"، ليرد الرئيس "يعنى لو كانت بـ 100 دولار دلوقتى إنت خدتها بـ 50 دولار بس ".. ليرد اللواء بهاء :"ايوه يا فندم ".
واستكمل الرئيس "ده واحد ضابط حط جهده وإرادته وضميره بذل جهد وقرر إنه يعمل ويحقق حاجه للبلد مش بس للجيش، أنا بقول الكلام ده عشان يكون فى كل المستشفيات، الجامعية وغيرها، وكل القطاعات.. فى الآخر أنا بطلع الدولار ده من فلوس مصر، لو أقدر أعمل بسعر مخفض للكل، عشان نقدمها بصورة مخفضة للناس".
وأضاف السيسى:"فين مدير كلية طب القوات المسلحة.. فين اللواء أيمن.. سيادة اللواء أنا محتاج أرفع مستوى التعليم مع جامعات من الخارج، ويدينى ترخيص بمزاولة المهنة.. وكمان محتاج إننا نطلع طلاب الكلية للدراسة فى الخارج.. وعايز أعرف قدرتنا إيه على استدعاء مدرسين من الخارج، يشتغلوا مع مدرسينا هنا".
رد مدير الكلية "إحنا بنتعاون فى مجال البحوث العلمية وأرسلنا 2 طلاب للصين، و2 آخرين فى الولايات المتحدة الأمريكية، وحصلوا على المركز الثالث فى مؤتمر للبحوث العلمية، ووزير الدفاع قام بتكريمهم.. كما أننا قمنا بإرسال 15 طالبا لمدة شهر للدراسة بالولايات المتحدة، ولدينا فترة تعايش 2 طلبة لمدة أسبوع مع جيش الدفاع اليابانى، و2 آخرين بالهند.. كما أن لدينا تعاون مع الدول العربية، وأرسلنا 30 طالبا لجامعة الشارقة مقسمين على أكثر من مجموعة، وسنرسل العام الدراسى الأكاديمى القادم بعثات لإنجلترا وأمريكا.. كما أن لدينا مدير التعليم الطبى إنجليزى من أصل مصرى، وتم اعتماده منذ يوليو الماضى، كما أن لدينا 12 خبيرا عملوا 14 ورشة عمل لأساتذة الكلية، لكى يتم تدريسه للطلبة بعد ذلك".
وتابع:"كما أن لدينا 2 من الطاقم الطبى حصلوا على درجة ماجستير التعليم الطبى من إيرلندا، كمنحة مقدمة من الشيخ القاسمى حاكم ولاية الشارقة، كما أن لدينا تعاون مع إحدى جامعات اسكتلندا، كما أننا نقوم بتطوير الكلية وتم الاتفاق مع اللواء كامل الوزير رئيس الهيئة الهندسية للقوات المسلحة على تكوير المعامل والأبنية التعليمية، ليرد السيسى:"أنا مصدقلك على أى حاجه تعملها، وده تصديق مفتوح بس خلّص".
وأضاف الرئيس:"احنا عايزين نقول للناس إن المصريين قادرين على أى حاجة، ودورنا الإعداد الجيد للجيل الجديد قبل ما نخرجهم، وفكر الكلية هو إعطاء الفرصة والسماح باستضافة الكليات المدنية، فى نظام شبه عسكرى، لكى تضخ المنظومة أفراد للقطاع المدنى، احنا فى مستوى جيد فى مصر وعايزين نزود المستوى أكتر، وعملنا نقلة.. ممكن كليات الطب فى القطاع المدنى تستفيد مننا وإحنا نستفيد منهم.. يبقى عندنا طبيب وتمريض جيد على أعلى مستوى".
وفى نهاية اللقاء قال اللواء هارون أبو سحلى مدير المجمع الطبى بكوبرى القبة:" قمنا بافتتاح 125 مشروعا خلال الـ 7 سنوات الماضية، وهناك 36 شركة مدنية، بطاقة 6 آلاف عامل شاركوا فى أعمال التطوير.. كل الشكر والتقدير للمشير محمد حسين طنطاوى الذى أولى اهتمام غير عادى بالمجمع الطبى.. كل الاحترام والتقدير لكل القائمين على المشروع". ورد الرئيس السيسى:"ده عمل عظيم، انجزناه فى مدة قصيرة، عشان نقدم خدمة طبية وسط أعمال انشاءات وتطوير، والمجمع إضافة للخدمة الطبية بالقوات المسلحة، كل الشكر للواء هارون وكل العاملين".
تم أضافة تعليقك سوف يظهر بعد المراجعة