أنا المتشدد الهايم فى حب الأرض
أنا الإرهابى لو فكر يمسّ العرض
عدوك يوم
أنا اللى مضيت بدمى كتير على ترابك
ونمتى الليل وأنا صاحى قصاد بابك
بلم هموم
أنا الجندى وأنا الفلاح أنا العامل
بحس بنقص وف دربك أنا الكامل
وبدعى لك ونبض القلب بيأمّن
وبدعى عليكى واكره كل من أمّن
وأعاكس دايماً الأمورة لو باركه
ولما بشوفها تتعاكس تقوم عاركه
وبحسد كل من هاجر بعيد عنك
واموت لو مره يضحك لى سوى سنك
بحب حليم واحب ارقص مع صافى
وظلمى لو على أرضك دا إنصافى
أنا حصرى أنا المصرى أنا المجنون
أنا العاقل أنا البايع وعمرى ما اخون
ساعة ماتضيق باخد سيلفى مع خوفو
وأنكت عز احزانى على شموخه
بخاف جداً
ولما تخافى يابلدى بكون مارد
ويصبح خوفى وبسرعة ساطور بارد
على رقبة عدوّينك
بحضنى تنامى وتقومى
وأطبطب لك على ضهرك
بحنيه ولا اتعبهوش
ولو حسيت بإن شهيقى كان مزعج
ما اطلعهوش
ولما تحسى بالراحة
أمرمغ بيكى طين أرضك وكل الكون
أقول تانى
أنا حصرى أنا المصرى أنا المجنون
تم أضافة تعليقك سوف يظهر بعد المراجعة