بالفيديو.. "جزار مودرن" فى الزمالك.. بكالوريوس تجارة ويتحدث 5 لغات.."عم زهران: "لفيت أوروبا 5 سنين.. وبعتبر نفسى جراح.. ولو رجع بيا الزمن هشتغلها تانى"

"ورثت المهنة أبا عن جد، ولو رجع بيا الزمن هقرر أشتغلها تانى، وبعامل اللحوم كجراح".. هكذا بدأ محمد زهران، 65 عاما، ويعمل جزارا بمنطقة الزمالك، حديثه لكاميرا "فيديو 7" قناة اليوم السابع المصورة.

حاصل على بكالوريوس تجارة

وروى قصته لكاميرا اليوم السابع: حصلت على بكالوريوس تجارة ولغات، ولدى 3 لغات أخرى اكتسبها بالممارسة: "الإنجليزى والفرنساوى بالدراسة وألمانى وإيطالى وروسى اكتسبتها بالممارسة".

واستطرد: "بدأت العمل مع والدى وأنا فى رابعة ابتدائى أثناء الإجازة الدراسية وكنت بقعد كاشير وباخد خبرة وأروح الشغل بعد ما برجع من مدرستى"، مشيرا إلى أنه "أخذ جولة فى أوروبا لمدة 5 سنين لكن جئت للعمل مرة أخرى وحبيت المهنة وأخدتها تحدى وإثبات، وأنا اعتبرت المهنة مش جزار لكن جراح".

عملى جعلنى راكب عربية ومتعلم لغات

وتابع "عم محمد": كنت بتعاير فى الجامعة بمهنتى لكن هى اللى وصلتنى إنى أكون جامعى وراكب عربية مركبهاش عميد فى الجامعة واتعلمت لغات منه وزى ما والدى علمنى، ولغينا الفكرة اللى متاخدة عن الجزار زمان اللى بالجلبية مش زى دلوقتى".

واستكمل: "للأسف ولادنا مش هيمارسوا المهنة ومبيجوش المحل غير زيارة.. ومش هيفرق معاهم كلهم مؤهلات عليا وعايشين فى مستوى معين وتعليم أجنبى.. ودلوقتى لو مفيش شغل فى المحل، بحل كلمات متقاطعة.. ولو رجع بيا الزمن هقرر تانى أشتغل جزار لأنى أثبت نفسى فيها".

للأسف ولادنا مش هيمارسوا المهنة ومبيجوش المحل

واستكمل: "من الأشياء المؤثرة فى حياتى دكتور نادر سويلم واللى كان أشهر دكتور تجميل فى مصر وكان صديق للوالد كان بيجى يقف يتفرج عليا وكان بينتقدنى فى حاجة واحدة إنى ماجبتش مجموع يؤهلنى إنى أدخل كليه طب، وكان هيخلينى أكون من أشهر دكاترة التجميل فى مصر ودى حاجة أنا باعتز بيها لأن إتقان العمل من الصفات الحميدة.. وزى ما ادتنى المهنة وضع اجتماعى وخلتنى فى مستوى مستور فلازم أحبها".