ما تيجى نبص بقلوبنا
ونعدل كل مقلوبنا
نلون كل شىء عادى
نشوفها مرة بالألوان
نرتب كل أوضاعنا
ويبقى كل موضوعنا
نخلى حياتنا لها معنى
تليق بى وبيك إنسان
نجرب صدق مشاعرنا
ما نضحكشى ف ألم غيرنا
ويبقى كل تفكيرنا
نعامل بعض بالإحسان
ننسى أى شىء جارح
وأى ملاحظة لمبارح
نعيش الوقت واللحظة
حبايب عشرة زى زمان
ما نتبترش ع النعمة
نِكسر نِفس مطامعنا
نفـرد وش تقاطيعنا
نهويها من الأحـــــزان
نعاتب بعض نتأسف
ونمحى كل شىء مؤسف
ما نتفزلكش نتفلسف
على الفاضى وع المليان
بدون مانميل لأى فريق
ونرفع راية التفريق
وننهى حوار بدم برئ
تعالى نعيش بكل أمان
نغير طبعنا الساخر
نجيب مع بعض م الآخر
نمد أيدينا ونسلم
وناخد بعض بالأحضان
تم أضافة تعليقك سوف يظهر بعد المراجعة