خالد الجندى: "اللى يتجوز الثانية وميقولش للأولى يبقى مش راجل"

طالب الداعية الإسلامى الشيخ خالد الجندى، الرجال بمعاملة الزوجة الثانية معاملة حسنة، قائلا "مينفعش الراجل ميتجوزش واحدة ويخرج بيها قدام الناس والكاميرات ويتجوز تانيه يخبيها تحت الطرابيزة ".

وأضاف الجندى، خلال برنامج نسمات الروح على قناة "الحياة": "أنا كخالد الجندى مجمعتش مع زوجتى زوجة تانية خالص، لكن انفصلت عنها بعد علاقة على اكمل ما يكون، وتزوجت زوجتى الجديدة، لأن الحقيقة اللى مش قادر يعمل ده ميعملوش انما تجيب واحدة تخرج بيها للمطاعم والتانية تطلع لها وانت لابس النضارة السودة وماسك الجرنال وطالع الساعة 3 الصبح عشان الجيران ميشوفكش.. الكلام ده تصرف غير شريف وغير صحيح، وكمان انك تخبى على مراتك الاولانية انك متجوز عليها، تبقى مش راجل، لأن ده تصرف غير شريف ولا يصح ولا يجوز من الناحية الشرعية يا جماعة الجواز ده نور، الجواز وضوح، الجواز إعلان، الجواز إشهار، الجواز معرفة، الجواز مش علاقة بين راجل وست الجواز علاقة بين أسرتين ربنا بيقول وجعل بينكم نسبًا وصهرًا أى بين عائلتين وليس بين فردين".

وأوضح الداعية الإسلامى: أنا عايز أقولكم ان فى عيال لما ابوهم بيموت بيكتشفوا ان اخواتهم جايين يعزوا اللى عمرهم ما شفوهم"، واى زوجة تقبل بهذا هى انسانة ستؤاخذ بين يدى الله يوم القيامة مهما كانت الأسباب".