جوزيه.. فلافيو..جيلبرتو.. شربتم من نيلها؟!

فكرة عبقرية سيطرت علىَّ بصورة أدهشتنى جدا، ألا وهى أن تعويض خيبة أملنا الكروية بالخروج «الكروى» أمام الجزائر، ممكن فى أنجولا بس محتاجين شوية مساعدة من ناس مقتنعة إن إللى حصل للمصريين فى أم درمان وقبلها فى البليدة كتير جدا على شعب طيب.. حتى لو كان المسئولين وحشين قوى خالص!

الفكرة فجرتها أغنية شيرين ماشربتش من نيلها.. فقررت أن أخاطب بهذه الأغنية ثلاثى الأهلى اللى شرب من نيل مصر، واللى عاش فى نادى على ضفاف هذا النيل، والثلاثى ده اثنين منهم أنجوليين هما جيلبرتو وفلافيو.. والثالث برتغالى الجنسية أنجولى الهوا.. محب لمصر.. هكذا كان ولايزال يقول!

الثلاثى اللى شرب من النيل يقدر يرد الجميل، حتى لو كانوا شربوا مياه معدنية، لأنها فى الآخر من النيل برضه، فماذا نطلب منهم؟!

أولا تقديم عرض يرضى المصريين أمام منافسهم الجزائرى.. والمؤكد أن الدعوات المصرية ستحيط المنتخب الأنجولى ومطلوبة.. بينى وبينكم.. وكمان أغلب الظن إنها مستجابة، لأن المصرى كرويا وفى أشياء كثيرة لم يعد يمتلك إلا الدعاء واستجابة السماء.. يعنى ممكن ندعى على اتحاد الكرة أن ربنا يخده، أو على الأقل ربنا يهده.. لأنه أبدا مش هايهديه من «الهداية والهدى»، لكن اللى مش ممكن أبدا أن ندعو جهات مراقبة أو مسئولة. أو سيادية للتدخل تخيلوا؟!

أما جوزيه فأنا متفائل إنه مش محتاج توصية، آى والله جوزيه مش هاينسى فضل مصر عليه، مش زى ناس البلد دى كبرتهم وغنتهم وروقتهم، لكن نسيوها.. ونسيوا حتى الميه اللى شربوها مع إنهم محسوبين علينا مصريين.

كنت ناوى والنية لله إنى آخد معايا جواب صغير أفهمه إن شعب مصر كله ساهم فى كتابته وإن جماهير الأهلى اللى هى جزء من الشعب المصرى بتوصيه بالاهتمام.. الجواب اللى مش هايبان من عنوانه بيقول:
يا عم مانويل إزيك وحشتنا كتير.. ربنا يكرمك وتكون فى أحسن حال.. وسلامنا للابن روى والمدام أم روى هانم وكل الأسرة فى البرتغال وضواحيها.

نعرفك إننا مشتاقين جدا ومنتظرين منك تجيب لنا جزء من حقنا فى مباراة الجزائر وماتنساش إنك روحت هناك ولعبت فى دورى الأبطال يعنى عارف كويس، إيه اللى بيحصل وإن الناس دى دايما ضدنا مع إنهم ولاد عمنا.

على فكرة ماتكلفش نفسك كتير، إحنا راضيين بجولين أو حتى جول يتيم يريح قلبنا ويضمن لفريقك الحالى «أنجولا» التقدم فى مجموعته.. وسيب الباقى علينا لأننا اتفقنا مع الأولاد بتوع المنتخب وحسن شحاتة على انتظار منتخب الجزائر فى الدور الثانى واللى على الله يكون، بس انت اعمل اللى عليك علشان مش كل مصر أهلاوية، وإحنا اتكلمنا معاهم عنك كتير وعن حبك لمصر كلها مش الأهلى بس.. وبنتمنى من الله يوفقك.. آمين، وفى النهاية كل المصريين بيقولوا لك مش هاننسا جميلك ونردها لك فى البطولات.